Ƴan bindiga na more rayuwarsu ba tare da tsangwama a jihar Katsina.

A Najeriya, musamman a lokacin azumin Ramadan, 'yan bindiga a wasu jihohin arewacin kasar ba su daina kai hare-hare kan jama'a ba.

Mafi girman harin da aka kai kwanan nan ya faru ne a daren Asabar a garin Mairuwa da ke karkashin karamar hukumar Faskari a jihar Katsina, inda aka kai hari kan masallatai.

Musa Ado Faskari, shugaban karamar hukumar, ya tabbatar da faruwar lamarin, yana mai cewa an kashe akalla mutane biyu kuma an yi garkuwa da mata biyu.

Ya kara da cewa karuwar hare-haren 'yan bindiga na nuna alamun tabarbarewar tsaro a yankin; "Babu abin da za mu iya cewa sai 'Innalillahi Wa Inna ilaihi raji'un' (Daga Allah muke kuma gare Shi za mu koma) domin al'amarin ya fi karfin abin da muka saba gani. Yanzu suna shigowa garuruwa kowace rana ba kakkautawa. A ranar Juma'a da ta gabata ma, sun shiga Yanmalamai, suka kashe mutane biyu kuma suka sace mata. Rahotanni sun nuna cewa 'yan bindigan sun gina manyan sansanoni a yankin karamar hukumar Faskari, abin da yasa suke iya kai hare-hare akai-akai. "Har da kashe wani soja suka yi a ranar Juma'a da yamma," in ji Musa Ado.

Shugaban na karamar hukumar Faskari ya bayyana cewa lamarin ya zama babban kalubale kuma suna kira ga gwamnatin tarayya da ta kawo musu dauki domin suna cikin mawuyacin hali "wannan matsalar na barazana ga rayuwarmu."

"Ya zama dole mu fuskance su a dazukan; ba zamu iya zama jiran su ba saboda suna amfani da dabaru na musamman wajen cutar da mu."

Jama'ar yankin karamar hukumar Faskari na cikin yanayin tsoro sakamakon hare-haren 'yan bindiga, abin da ya tilasta rufe wasu daga cikin hanyoyin yankin.

A wata hira da aka yi da shi, gwamnan jihar Katsina, Umaru Dikko Radda, ya karyata zarge-zargen da ake yi wa gwamnatinsa na gazawa wajen kare rayuka da dukiyoyin al'umma, duk da ci gaba da hare-haren 'yan bindiga a wasu sassan jihar.

Gwamnan ya bayyana cewa tun daga lokacin da ya karbi ragamar mulki, gwamnatinsa ta samu manyan nasarori wajen yaki da 'yan bindiga, har ma da kafa wata runduna ta musamman ta tsaro wadda, a cewarsa, ta taka muhimmiyar rawa wajen dakile ayyukan 'yan bindiga.

Ya jaddada cewa: "Mazauna Jibia, Batsari, Kankara, Danmusa, Sabuwa, Faskari, da Dandume sun shaida cewa an samu raguwar matsalar tsaron da muke fuskanta a jihar Katsina."

Jihar Katsina, wacce take daga cikin jihohin arewacin Najeriya da suka fi fama da matsalolin tsaro, na ci gaba da fuskantar kalubalen 'yan fashin daji wadanda ke kai hare-hare, yin garkuwa da mutane don neman kudin fansa, da kuma sace-sacen dukiyoyin al'umma.